URTEAN ZEHARREKO XVIII. DOMEKA
C urtean
I. Irakurgaia
Zer gelditzen
jako gizakiari
egin dauan
hainbeste lan eta eginahaletatik?
Kohelet liburutik
Koh 1, 2; 2, 21-23
Huskeria hutsa –dino Koheletek–,
huskeria
hutsa, dana huskeria da.
Izan be, jazotzen da batek buruz, egoki eta trebetasunez lan egin ondoren, ezer egin ez dauanari dana itzi beharra. Hau be huskeria da eta oker handia. Zer gelditzen jako gizakiari eguzkipean egin dauan hainbeste lan eta eginahaletatik? Egunero atsekabea besterik ez dau, eta bere lanetan nekea; gauez be ez dau atsedenik haren bihotzak. Hau be huskeria da.
Jaunak esana.
Erantzun salmoa
Sal 90 [89], 3-4. 5-6. 12-13. 14 eta 17 (R/. ik. 1)
R/. Jauna, gure ihesleku Zeu izan zara
gizalditik gizaldira.
V/. Gizakia hautsera bihurtuarazoten dozu,
esanez:
«Bihurtu lehenera, gizakiok».
Bai,
mila urte zure begietan
atzo
igaro zan eguna adina,
gaualdi
bat adina. R/.
V/. Hor daroazuz gizakiak,
amesa
lez dira;
ernetzen
dira goizean bedarra lez;
goizean
erne eta loratzen da-eta,
arratsaldean
zimeldu eta igartzen. R/.
V/. Irakatsi egiguzu geure egunen kontua eroaten,
zuhurtasunaren
muinaz jaubetu gaitezan.
Bihurtu
zakiguz, Jauna! Noiz arte?
Errukitu
zaitez zeure zerbitzariez. R/.
V/. Asetu gaizuz goizero zeure maitasunaz,
poztu
gaitezan eta zoriontsu izan geure egun guztietan.
Betor
gugana Jaunaren, gure Jainkoaren, gozotasuna
eta
sendotu begi harek gure eskuen lana;
sendotu
dagiala, bai, gure lana. R/.
II. Irakurgaia
Bilatu egizuez zeruko gauzak, han dago-eta Kristo.
San Paulo Apostoluak Kolosarrei egindako epistolatik
Kol 3, 1-5. 9-11
Senideok: Kristogaz berbiztu zarien ezkero,
bilatu egizuez zeruko gauzak, han dago-eta Kristo, Jainkoaren eskumaldean
jesarrita. Bilatu egizuez goiko gauzak, eta ez lurrekoak, hilda zagozelako, eta
zuen bizia Kristogaz dago Jainkoagan gordeta. Kristo, zuen bizia, agertuko
danean, zuok be aintzatsu agertuko zarie haregaz batera.
Hilarazo egizuez, beraz, zeuen barruan mundu
honen araberako jarrerak: lizunkeria, lohikeria, nahikeria eta grina txarrak
eta idolatria dan diru-gosea. Ez esan alkarri guzurrik, izaera zaharra eta
honen araberako jokabidea erantzi eta barria jantzi dozuen ezkero; izaki barri
zarie, beraren egile dan Jainkoaren irudira erabarrituz doana, ezaguera
beteagora heltzeko. Hor ez dago honezkero ez greziarrik eta ez judegurik, ez
erdaindurik eta ez erdainbakorik, ez kulturadunik eta ez kulturabakorik, ez
esklaborik eta ez librerik; Kristo da guztia, eta guztiengan bizi da.
Jaunak esana.
Aleluia
Mt 5, 3
R/. Aleluia.
V/. Zorionekoak gogoz behartsu diranak,
eurena
dabe-eta Jainkoaren erreinua. R/.
Ebanjelioa
Norentzat izango dok pilatu doana?
✠ Jesu Kristoren Ebanjelioa San Lukasen liburutik
Lk 12, 13-21
Aldi haretan, jente arteko batek esan eutson
Jesusi: «Maisu, esaiozu nire anaiari senipartea nigaz erdibana egiteko».
Jesusek
erantzun eutson: «Lagun, nork jarri nau Ni zuen artean epaile edota
ondasun-banatzaile?» Eta jenteari esan eutson: «Kontuz! Gorde zeuen burua
diru-gosetik ze, ondasunek ez deutsoe inori bizia segurtatzen, ugariak izanda
be».
Gero, parabola hau kontatu eutsen: «Gizon
aberats bati lurrak uzta handia emon eutson. Eta holantxe pentsatzen hasi zan
berekautan: “Zer egin, ze ez daukat uzta non jasorik”.
Eta
beretzat esan eban:
“Badakit zer egin: garautegi
zaharrak bota eta handiagoak
egingo dodaz eta hareetan jasoko dodaz garia eta gainerakoak. Gero, esango
deutsat neure buruari: “Ea, mutil! Badaukak hor gordeta urteetarako nahiko
ondasunik; hartu atseden, jan, edan eta ondo bizi!”
Baina Jainkoak esan eutson: “Burubako
halakoa! Gaur gauean bertan hil behar dok. Norentzat izango dok pilotu doana?”»
Eta holantxe amaitu eban Jesusek: «Horra zer
gertatzen jakon, Jainkoarentzat aberats izan beharrean, ondasunak beretzat
pilotzen dituanari».
Jaunak esana.