URTEAN ZEHARREKO IX. DOMEKA
C urtean
I. Irakurgaia
Arrotzen bat etortzean, entzun egiozu.
Erregeak lehenengo liburutik
1 Erg 8, 41-43
Egun hareetan, honan egin eban Salomonek otoitz tenpluan: «Izango dabe arrotzek be zure izen handi, esku indartsu eta egintza ahaltsuen barri. Zure izenak erakarrita, zure herri Israelgoa ez dan arrotzen bat urruneko lurraldetik etortzen bada tenplu honetan otoitz egitera, entzun Zuk zerutik, bizi zaran leku horretatik, eta emoiozu arrotzari eskatuko deutsun guztia. Holan, lurreko herri guztiek jakingo dabe zure izenaren barri eta begirune izango deutsue, zeure herri Israelek lez. Eta jakingo dabe gainera nik eraikitako tenplu hau zure izenari eskeinita dagoala».
Jaunak esana.
Erantzun salmoa
Sal 117 [116], 1. 2 (R/. Mk 16, 15)
R/. Zoaze mundu guztira eta iragarri Barri Ona.
Edo: Aleluia.
V/. Goratu egizue Jauna, nazino guztiok,
goratu
egizue, herri guztiok. R/.
V/. Sendoa da-eta guretzat haren maitasuna,
beti-betikoa
Jaunaren leialtasuna. R/.
II. Irakurgaia
Oraindino
gizakiei atsegin emon guran banenbil,
ez nintzateke
Kristoren zerbitzari izango.
San Paulo Apostoluak Galaziarrei egindako epistolaren hasiera
Ga 1, 1-2. 6-10
Nik, Paulok, ez giza aginduz edo
izendapenez, Jesu Kristoren eta hau hilen artetik biztu eban Jainko Aitaren
izendapenez apostolu nazan honek baino, eta nigaz diran senide guztiek,
Galaziako eleiz alkarteei.
Harriturik nago, Kristoren onginahiaz dei
egin eutsuenagandik aldendu eta beste barri on batera zein bizkor aldatu zarien
ikusiz. Ez dago, ostera, beste barri onik; baina badabiltz hor batzuk zuek
nahasten, Kristoren Barri Ona goitik behera irauli guran.
Beraz, norbaitek, gu geu nahiz zeruko
aingeruren bat izanik be, iragarri geuntsuena ez dan beste barri on bat
iragartzen badeutsue, izan bedi madarikatua! Lehen be esan neutsuena dinotsuet
orain barriro: madarikatua, hartu dozuen Barri Ona ez dan beste bat iragartzen
deutsuena!
Gizakien onespena bilatzen ete dot nik ala
Jainkoarena? Gizakiei atsegin emoten ahalegintzen ete naz ni? Oraindino
gizakiei atsegin emon guran banenbil, ez nintzateke Kristoren zerbitzari
izango.
Jaunak esana.
Aleluia
Ik. Jn 3, 16
R/. Aleluia.
V/. Hain maite izan eban Jainkoak mundua,
bere
Seme bakarra emon eutson;
harengan
sinisten dauanak betiko bizia dau. R/.
Ebanjelioa
Israelen bertan be ez dot aurkitu holako sinismenik.
✠ Jesu Kristoren Ebanjelioa San Lukasen liburutik
Lk 7, 1-10
Aldi haretan, Jesus, herriari egindako
hitzaldia amaiturik, Kafarnaumen sartu zan. Bazan han erromatar ehuntari bat,
eta honek morroi bat eban oso maitea; morroia txarto egoan, hilzorian.
Ehuntariak, Jesusen barri entzunik, judegu-buruzagi batzuk bialdu eutsozan,
morroia osatzera etortzeko erreguaz.
Hareek, Jesusengana joanik, arren eta arren
eskatu eutsoen: «Merezidu dau Zuk hori egitea, ze, maite dau gure herria eta
berak egin deusku sinagoga be».
Jesus eurekin joan zan. Etxetik hur samar
zala, lagun batzuk bialdu eutsozan ehuntariak, esatera: «Ez hartu nekerik,
Jauna, ze, ni ez naz inor Zu nire etxean sartzeko. Horregaitik, ez naz ausartu
neu Zugana joaten; nahiko dozu berba bat esatea, nire morroia osatzeko. Neuk
be, neu inoren menpean egon arren, soldaduak ditut neure menpean, eta bati
joateko agintzen badeutsat, joan egiten da; beste bati etortzeko agindu, eta
etorri egiten da; eta nire morroiari zeozer egiteko esan, eta halan egiten
dau».
Hau entzutean, Jesus harritu egin zan
haretaz eta, ondorik etorkion jenteagana bihurturik, esan eban: «Egia esan,
Israelen bertan be ez dot aurkitu holako sinismenik». Mandatariak etxera
bihurtu ziranean, osatuta aurkitu eben morroia.
Jaunak esana.